Rheoli adar sy'n bwyta pysgod ar afon i warchod eogiaid yr Iwerydd neu frithyllod môr

Gall mulfrain a hwyaid danheddog weithiau ysglyfaethu eogiaid yr Iwerydd a brithyllod môr ifanc. Gall hyn effeithio ar statws cadwraeth y ddwy rywogaeth o bysgod.

Defnyddio dulliau dychryn nad ydynt yn farwol

Gallwch chi reoli'r problemau hyn drwy ddefnyddio dulliau dychryn nad ydynt yn farwol megis:

• presenoldeb gweledol pobl/cŵn
• dynion/merched pren neu fwganod brain
• barcutiaid neu falwnau heliwm
• goleuadau sy’n fflachio neu laserau
• canon nwy
• saethu drylliau i ddychryn gan ddefnyddio bwledi gwag
• bioacwsteg (galwadau ysglyfaethwyr neu ofid/larwm)
• gwrthrychau eraill sy'n cynhyrchu sain megis melinau gwynt neu dapiau sy’n ‘hymian’ yn y gwynt
• cael gwared ar safleoedd clwydo
  
  

Gwneud cais am drwydded

Weithiau gallwn roi trwyddedau ar gyfer rheolaeth farwol i gefnogi dulliau nad ydynt yn farwol. Rhaid eich bod wedi rhoi cynnig ar ddulliau nad ydynt yn farwol a rhaid eu bod wedi cael effaith gyfyngedig neu ddim effaith o gwbl.

Gwybodaeth y mae'n rhaid i chi ei darparu yn eich cais

• Enw, cyfeiriad a manylion cyswllt yr ymgeisydd
• Enw a chyfeiriad yr unigolyn sy’n gyfrifol (asiant achrededig trwyddedig) ar gyfer pob rhan o'r afon
• Cyfeirnod grid deg digid ar ddechrau a diwedd pob rhan o’r afon yr hoffech reoli adar ynddi
• Cyfrifiad o adar gan ddefnyddio dull sy’n seiliedig ar ddalgylchoedd
• Map yn dangos pob rhan o’r afon
• Pa ddulliau nad ydynt yn farwol a ddefnyddiwyd gennych a disgrifiad byr o’r canlynol:
  • pan wnaethoch chi eu defnyddio nhw
  • pa mor effeithiol oedden nhw
  • pam na wnaethoch chi ddefnyddio dulliau eraill nad ydynt yn farwol

Pa mor hir mae'n ei gymryd

Byddwn yn gwneud penderfyniad o fewn 40 diwrnod gwaith ar ôl i gais cyflawn ddod i law.

Faint fydd yn ei gostio

Nid ydym yn codi tâl am y math hwn o gais am drwydded.

Dechreuwch eich cais

Dim ond rhwng, ac yn cynnwys, 1 Hydref a 17 Mawrth y gallwn gyhoeddi trwyddedau.